Zjarret masive i kanë shndërruar në ferr, brigjet jugperëndimore të Turqisë, parajsën e turistëve europianë e më gjerë. Turistët po braktisin hotelet dhe resortet e destinacionit të famshëm të Bodrumit, pasi qeveria urdhëroi evakuimin e tyre për shkak të zjarreve masive që për momentin është e pamundur të vihen nën kontroll.
Mediat e huaja kanë publikuar pamjet e shkatërrimeve të shkaktuara nga flakët në brigjet e Egjeut.
Mijëra ha pyje shihen të shkrumbuara nga flakët, e banesa të tëra, janë shkatërruar plotësisht. Sipas raportimeve zjarri ka shpërthyer në plot 40 provinca, e puna e zjarrfikësve e ekipeve të emergjencës po bëhet gjithmonë më e vështirë për shkak të erërave të forta, që po favorizojnë flakët.
Më 20 korrik, temperaturat kanë shënuar deri në 49.1 gradë Celsius, e zjarret dyshohet se kanë nisur pikërisht nga ky shkak. Disa të tjerë besojnë se zjarrvënia ka qenë e qëllimshme, e në këtë drejtim, policia ka bërë disa arrestime dhe po heton.
Banorët kanë treguar të gjithë tmerrin e përjetuar, e kanë rrëfyer momentet kur kanë parë shtëpitë totalisht të mbuluar nga flakët.
“Shtëpia ime po digjet, shtëpia ime, shtëpia ime… oh Zoti im. Gjithçka po ndodh shumë shpejt”, u shpreh një grua.
Kujtojmë se zjarret kanë prekur edhe zonat turistike, si Bodrumi dhe Antalia.
