Me stinën e verës kaq pranë, pamja e Shengjinit dhe Tales duhet ndryshuar. Dëmet e natyrës në këto zona kanë nevojë të evitohen dhe bregdeti të shfaqet si dëshira e çdo vizitori apo pushuesi. Plastika e sjellë nga deti, rëra nëpër trotuare e transportuar nga erërat e forta, ndonjë mbetje urbane e lënë pa kujdes nga qytetarë apo vizitorë gjatë vitit duhen larguar pasi janë gabimisht aty ku ndodhen.
Ky është momenti më i mirë, pasi temperaturat kanë nisur të rriten dhe në Shengjin e Tale kanë nisur të shfaqen pushuesit. Këta të fundit duan të gjejnë një ambjent të pastër, sherbime të shtuara e të përmirsuara, çmime konkuruese dhe zgjedhje të ndryshme për ti bërë pushimet sa më argëtuese. Ndërhyrjet kanë nisur. Qendra e Shengjinit është e para që po transformohet për të qënë gati që të presë mijëra pushues dhe vizitorë çdo ditë. Drejtoria e Sherbimevë në Bashkinë e Lezhës është zhvendosur thuajse e gjitha në këtë zonë. Kujdesi ndaj ambjentit është fokusi kryesor dhe vëmendja e parë për këtë zonë.
Ka nisur largimi i rërës nga shëtitorja dhe punimi i lulishtes përgjatë shëtitorës Willson. Kjo si elementi i parë për një pamje të re, ndërsa vizitorët kanë nisur të shtohen, kryesisht në fundjavë. Edhe qendra e qytetit të Shengjinit po kurohet në mënyrë që pamja e saj vizive të jetë tërheqëse dhe e bukur. Përshkak se sezoni duket që do të nisë shumë shpejt, ndërhyrjet në plazhe janë konsideruar si aksion që nuk duhet të ndalojë asnjë moment deri në prezantimin dinjitoz të këtyre zonave turistike. Duket se ky sezon veror do të ketë edhe risi!
Ato janë diskutuar nga Bashkia e Lezhës me grupet e interesit dhe janë dakortësuar si një domosdoshmëri për një sezon të suksesshëm. Në takimin e realizuar, Kryetari i Bashkisë Lezhë, Pjerin Ndreu, ka bërë publike disa nga ndryshimet që do të evidentohen këtë sezon veror dhe që sipas tijë do të sjellin transformim total e për pasojë një imazh më të mirë ndaj bregdetit në Lezhë. Gjithçka do të nisë me kontratat e reja që do të nënshkruhen me stacionet e plazhit. Duke nisur nga kjo verë, ato do të jenë 5 vjeçare me detyrimin që sipërfaqet ranore të mirëmbahen edhe jashtë sezonit turistik por padiskutim duke mos lënë jashtë vëmendjes çdo pikë të kontratës.
Mos respektimi i saj do të sjellë penalitete deri në ndërprerjen e kontratës. Për këtë, kryebashkiaku Ndreu, ka bërë të ditur se krahas inspektimeve nga grupet e punës të ngritura për këtë qëllim, do të jetë vetë present për të identifikuar çdo parregullsi. Lëvizja e mjeteve të rënda nuk do të lejohet më asnjë fundjave deri me 15 qershor dhe pas kësaj date do të kufizohet lëvizja e tyre e plotë deri me 15 shtator.
Një masë e tillë vjen si nevojë për të eleminuar fillimisht zhurmat dhe kaosin në lëvizjen e mjeteve. Mbeturinat do të nxirren në koshat e vendosur nga bashkia vetëm nga banorët rezidentë, pasi për pushuesit në hoteleri ato do të jenë të detyrueshme të lihen në koshat që ndodhen brenda ambjenteve të vetë operatorëve turistik. Edhe këtë verë, bizneset do të kenë orar të reduktuar për nxjerrjen e mbeturinave dhe kjo për të evituar grumbullimin e tyre dhe aromën e pakëndshme që shkaktojnë. Zhurma nga muzika e lartë në bizneset që operojnë në bregdet do të ketë vëmendje këtë verë.
Ajo do të jetë e kufizuar, përveç rasteve kur ajo është çertifikuar nga autoritetet dhe përmbush disa kritere që nuk cënojnë pushuesit apo rezidentët. Mundësia për të shmangur edhe këtë verë konkaktin ndërmjet pushuesve që duan të shijojnë shëtitjet e mbrëmjes do të jetë arsye për kthimin në pedonale të segmentit rrugor përbri shëtitores Willson. Parkimi përgjatë shëtitorës së Kunes do të jetë me pagesë. Kjo shihet si një mundësi për të ndikuar në mirëmbajtjen e segmentit dhe përmirsuar shërbimet në këtë zonë.
Përshkak të nevojës për të patur edhe këtë verë një sezon të sukseshëm, ndërhyrjet për mirëmbajtjen e ambjentit dhe shtimit të elementëve të konkurueshmërisë ka bërë që Bashkia e Lezhës të përmirsojë performancën e saj në sherbim të zonave turistike e për pasojë për të ndikuar tek vizitorët dhe pushuesit.
Masat do të shtrihen edhe tek firmat kontraktuale të mirëmbajtës së gjelbërimit, sipërmarrjes së pastrimit dhe vendosja e takimeve periodike me drejtuesit rajonalë të drejtorive që kanë impakt në turizëm siç janë OSSHEE, Drejtorinë Vendore të Policisë, Sh.a. Ujësjellës Kanalizime, Policinë Kufitare, Drejtorinë e Portit, AKU, Inspektoriatin Mjedisor, Inspektoriatin Shendetësorë, Njësine Vendore të Kujdesit Shendetësor dhe aktorë e faktorë të tjerë që kanë ndikim në turizëm.
