Një situatë e çuditshme është regjistruar këtë të diel në Vlorë. Një komisioner është paraqitur në qendrën e votimit, ndonëse është i infektuar me COVID-19. Ka qenë nëna e tij që i ka “prishur planin” sepse ka paraqitur një dokument që tregon se ai është i infektuar. Në këtë mënyrë, ai është larguar nga qendra e votimit, pavarësisht rezistencës së tij.
Kujtojmë që këto janë zgjedhjet e para në Shqipëri që zhvillohen në kushte pandemie. Për shkak të situatës, të infektuarit nuk do të lejohen të votojnë.
Po ashtu, komisionerët duhet të vetëdeklarojnë se nuk janë të sëmurë, me qëllim që të kryejnë detyrën. Ambientet ku do të votohet janë dezinfektuar 24 orë para se të niste procesi, ndërsa do të ketë dezinfektim edhe gjatë ditës. Votimi duhet të kryhet në respektim të masave anti-COVID, me maskë e distancë.
