Shtetet e Bashkuara të Amerikës dhe aleatët janë të shqetësuar për shkak të shtimit të rreth 50 mijë trupave ruse përgjatë kufirit me Ukrainën. Sekretari i Shtetit, Antony Blinken dhe Sekretari i Përgjithshëm i NATO-s thonë që Rusia duhet të ndërpresë menjëherë këtë ofensivë.
Korrespondenti i CNN, Matthew Chance ndodhet në Ukrainë dhe na sjell një raportim ekskluziv nga vija e parë e konfliktit.
Fronti në Ukrainën lindore është vendi ku po zien edhe një herë konflikti me rebelët e mbështetur nga Rusia, që ka shqetësuar Amerikën. Teksa tensionet me Rusinë rriten gjithnjë e më lart, CNN ka arritur të shoqërojë presidentin e Ukrainës, gjatë vizitës së tij të planifikuar me kujdes, duke lëvizur me shpejtësi, në qiell dhe nën tokë, për të shmangur plumbat.
Matthew Chance: Zgjati shumë kjo luftë, prej 7 vitesh tashmë.
Volodymyr Zelensky: Po, për 7 vite.
Matthew Chance: Si janë ushtarët? A po mbahen, apo janë të lodhur nga kjo luftë?
Volodymyr Zelensky: Janë të lodhur, sigurisht, si kushdo tjetër. Janë 7 vite, më shumë sesa ka zgjatur Lufta II Botërore. Dhe siç e shikoni, është e tmerrshme.
Më e gjatë se Lufta II Botërore. Por duke parë rrjetin kompleks të llogoreve në mes të baltës, e ashtuquajtura “vijë kontakti” – që në disa raste është vetëm pak dhjetëra metra distancë – duket më shumë si e Luftës I Botërore.
Matthew Chance: “Jemi futur në këtë labirint llogoresh që janë hapur përgjatë frontit dhe mund t’iu them se duket sikur jemi kthyer pas në fillim të shekullit XX, në Luftën e Madhe. Sepse nuk kam parë asgjë të ngjashme në luftërat moderne.
Por në fakt, ky është konflikti modern – realiteti i përballjes me Moskën dhe satelitët e saj.
Matthew Chance: A ka mundësi që rusët të jenë duke planifikuar pushtimin?
Volodymyr Zelensky: Sigurisht, sigurisht. E dimë këtë, që prej vitit 2014 e dimë që çdo ditë mund të jetë dita e pushtimit. Ata janë gati, por edhe ne jemi gati, sepse jemi në tokën dhe territorin tonë.
Kjo është arsyeja pse Ukraina, dhe Shtetet e Bashkuara me aleatët, janë kaq të alarmuar. Mes tensioneve në rritje, kemi një shtim dramatik të forcave ruse përgjatë kufirit me Ukrainën dhe në Krime.
Pamjet e fiksuara nga celulari tregojnë marshimin e autokolonave dhe të mjeteve të rënda ushtarake që transportohen përmes hekurudhës drejt kufirit.
Zyrtarët ushtarakë ukrainas thonë për CNN se vlerësojnë që më shumë se 50 mijë trupa ruse janë mbledhur tashmë aty… Moska thotë se është vetëm një stërvitje, jo kërcënim. Por në front lufta ka nisur me snajperë. Zyrtarët ukrainas thonë se deri tani, këtë vit, kanë humbur jetën më shumë se 20 ushtarë.
Në terren, edhe presidentit i duhet të ruhet…
Matthew Chance: Duhet të vrapojmë, apo jo?
Volodymyr Zelensky: Po, vrapo, vrapo.
Matthew Chance: Në rregull, shkojmë atëherë.
Matthew Chance: Kemi arritur tani pranë vijës së parë ndarëse mes forcave ukrainase dhe separatistëve të mbështetur nga Rusia. Unë dhe presidenti Zelensky vrapuam për të mbërritur deri këtu, për të gjetur strehë, sepse situata është e paqëndrueshme, dhe mundësisht e rrezikshme.
I zgjedhur 2 vite më parë me premtimin se do t’i jepte fund këtij konflikti – diçka që nuk e ka bërë – presidenti Zelensky thotë se rrezikon duke vizituar këto “pika të nxehta”, siç i quan ai, për t’u treguar ushtarëve që kanë mbështetje politike.
Por ai thotë që Ukraina ka nevojë për më shumë ndihmë nga Uashingtoni. Më shumë armë, më shumë para dhe – ajo që është më e rëndësishme – më shumë mbështetje për t’u bërë pjesë e NATO-s, aleancës ushtarake perëndimore.
Fjalët mbështetëse të presidentit Biden, thotë ai, thjesht nuk mjaftojnë më.
Volodymyr Zelensky: Ukraina ka nevojë për më shumë se fjalë.
Matthew Chance: Ju e kuptoni që, nëse Ukraina do të merrte anëtarësimin e NATO-s, kjo mund ta bëjë edhe më keq gjendjen e konfliktit në këtë vend? Do të tërbonte Moskën.
Volodymyr Zelensky: Ndoshta keni të drejtë. Por çfarë po ndodh tani? Çfarë po bëjmë ne këtu? Njerëzit tanë çfarë po bëjnë? Po luftojnë. Kështu mund të jetë edhe në të ardhmen, këtë nuk e di. Por ne jemi një vend i pavarur dhe e vendosim ne se ku duam të jemi e ku jo. Të rrosh a të mos rrosh? E mbani mend Shekspirin?
E në fakt, pikërisht kjo, është çështja… Ose, sa shumë mbështetje amerikane mund të presë tani presidenti ukrainas, për dramën që po luhet në këtë teatër lufte?
