Kombëtarja shqiptare ka bindur në ndeshjen e parafundit në grup në Ligën e Kombeve, duke fituar 3-1 ndaj Kazakistanit. Një sukses që e ngjit skuadrën kuqezi në vendin e dytë, pasi Bjellorusia mposhti 2-0 Lituaninë.
Cikalleshi kaloi në 16’ në avantazh kuqezinjtë. Pas harkimit nga e djathta nga ana e Memushajt, bomberi kavajas nuk fal duke goditur saktë me kokë. Goli i parë i Shqipërisë në stadiumin e ri “Air Albania”.
Pas 7 minutash, realizon edhe mbrojtësi Ismajli. Pas një këmbëngulje të admirueshme, shqiptari përfiton nga rrëmuja në portën e Kazakistanit dhe nuk fal brenda zonës duke e dërguar topin në rrjetë. Por ndodh e pabesueshmja, miqtë realizojnë nga mesi i fushës me anë të Abiken!
Pjesa e dytë ishte disi më e ekuilibruar, por kazakët nuk rrezikojnë. Për të ardhur në minutën e 61-të, Abrashi merr penallti dhe Manaj shënon saktë për 3-1. Më pas kuqezinjtë qarkulllojnë dendur topin, në fund kanë dy raste, por nuk shënojnë. Gjithsesi, misioni u arrit, por duhet edhe fitorja më 18 nëntor ndaj Bjellorusisë për vendin e parë.
