Deputetët e opozitës parlamentare Myslim Murrizi dhe Artur Roshi kanë fituar betejën gjyqësore me Kuvendin pas vendimit të marrë në mënyrë arbitrare nga Gramoz Ruçi për tiu mbajtur gjysmën e pagës së tre muajve gjatë pandemisë së shkaktuar nga Covid 19.
Në vendimin e Gjykatës Administrative së Shkallës së parë argumentohet se dhurimi i pagës është diçka e vullnetshme dhe jo kolektiv ndërkohë që mandati i deputetit është individual.
Gjykata thekson se mandati i deputetit është individual dhe përgjegjësia mbi sjelljen e gjithsecilit mbi këtë mandat shihet rast pas rasti dhe nuk mund të justifikohet me sjellje kolektive. Në rastin konkret ndalesa e pjesshme në masën 50 përqind të pagës mujore neto për paditësit Myslim Murrizi dhe Artur Roshi është bërë në kundërshtim me ligjin. Situata ekonomike e shkaktuar nga COVID-19 nuk përbën shkak të përligjur për cënimin e pagës së deputetit pasi sikurse u theksua më sipër dhënia e kontributit financiar me qëllim përballimin dhe lehtësimin e kësaj situate është një akt i vullnetshëm dhe jo i detyruar, thuhet në arsyetimin e gjykatës.
Përpos pagës kjo pagesë do ti reflektohet edhe në librezën e punës kërkesë kjo e dy deputetëve. Shumë institucione u detyruan që të jepnin diçka nga pagat në kohën e pandemisë por duket se dy deputetët me rroga mbi një milionëshe e kanë pasur të pamundur që të jepnin kontributin e tyre për arkën e shtetit.
