Emisioni Stop në Tv Klan, këtë të premte ka trajtuar denoncimin e mësuese Valbona Cjapi, e cila është pjesë e stafit pedagogjik të shkollës 9 vjeçare 5 dëshmorët. Cjapi ka hedhur në gjyq drejtorin e shkollës ku punon, pasi është ndjerë e fyer në një mbledhje me mësuesit.
Për shkak të pjesëmarrjes në seancat gjyqësore ka njoftuar drejtorin, por nëndrejtoresha e njofton se i janë mbajtur ditët e punës nga paga për çdo herë që kishte qenë në seancë.
Mësuesja pasi ka mbledhur të gjithë dokumentacionin dhe është e bindur se ndaj saj është bërë një padrejtësi është drejtuar në emision dhe ka bërë publik rastin e saj. Ajo shprehet se drejtori i ka mbajtur ditët e punës pa të drejtë, pasi ajo e ka informuar për çdo mungesë që ka bërë dhe arsyen që ka pasur.
Në Zyrën Vendore Arsmore Roskovec Valbonës i kanë thënë se ato ditë quhen të paarsyetuara pasi nuk ka marrë leje apo të ketë paraqitur raport mjekësor. Nga ana tjetër në ditën e fundit të shkollës Valbona ka marrë vlerësimin nga drejtori i shkollës dhe në hapësirën e mungesave pa arsye, nuk ka asnjë të tillë. Gazetarja e emisionit ka kërkuar një takim dhe me drejtorin e shkollës për të dëgjuar versionin e tij i cili në fillim refuzon të bisedojë por më pas pranon.
