Drejtoresha e Zyrës së Punës, Rozafa Zmijani në një komunikatë më gazetarin e Report Tv, Ergys Kavaja ka reaguar në lidhje me akuzat që u hodhën sot ndaj saj nga ish deputetja e PD, Izmira Ulqinaku. Kjo e fundit deklaronte se Zmijani shpërndan në mënyrë klienteliste fondet publike për subjektet që janë të gatshme të bashkëpunojnë në skemën korruptive të punësimit.
Sipas pretendimeve të PD dhe të Ulqinakut punonjës që derdhin kontribute rregullisht përgjatë gjithë vitit, regjistrohen fiktivisht si të papunë në sistemin e Shërbimit Kombëtar të Punësimit, për tu çregjistruar më pas si përfitues të programit të Zyrës së Punës.
Ndërkohë këto akuza janë mohuar nga Zmijani ku kjo e fundit ka deklaruar se do të ndjekë të gjitha procedurat ligjore dhe do të padis në gjykatë PD si dhe ish-deputeten Ulqinaku. Sipas saj ky është një sulm i pastër politik.
Akuzat e ngritura nga PD janë shpifje. Unë do të ndjek të gjitha procedurat ligjore dhe do padis në gjykatë PD dhe ish deputeten Izmira Ulqinaku. Ky është një sulm i pastër politik ndaj meje, kam punuar me ndershmëri dhe do vazhdoj ta bëj” ka thënë Rozafa Zmijani për gazetarin e Report Tv, Ergys Kavaja.
