Edhe këtë vit trendi i regjistrimeve në Universitet nuk ka ndryshuar. Më të mirët kanë preferuar programet e Universitetit të Mjekësisë, ndërsa vetëm në fazën e parë janë regjistruar rreth 5 mijë maturantë.
Faza e parë e regjistrimeve në Universitet nuk ka sjellë surpriza as këtë vit.
Trendi mbetet i njejtë. Ekselentët kanë preferuar programin e Mjekësisë së Përgjithshme, ku në 48 orë janë plotësuar 200 kuota nga 260 të tilla që ofron kjo degë.
Arjan Xhelaj: Programi i Mjekësisë së Përgjithshme është ezauruar deri në 70% dhe pothuajse ezaurohen në dy fazat e para të raundit të parë. Ecuri të mirë ka edhe dega e Infermierisë, sidomos edhe në Universitetet rajonale.
Shkencat ekonomike vijnë të dytat në listë, ndjekur nga programet e drejtësisë.
Arjan Xhelaj: Kemi degët e Ekonomisë rreth 18% të regjistruar, Shkencat Politike dhe Sociale rreth 13% dhe Mësuesia mbi 10%.
Drejtori i Rrjetit Akademik Shqiptar, Arjan Xhelaj, thotë se pas regjistrimit të maturantëve ekselentë të tjerët do të kenë më shumë mundësi për të fituar programin që dëshirojnë.
Vetëm në fazën e parë janë regjistruar rreth 5 mijë maturantë.
Arjan Xhelaj: Do të ketë një ecuri dhe më të shpejtë gjatë raundeve të tjera ku shumë maturantë duke filluar nga nesër do ta shikojnë veten fitues në degë të ndryshme dhe do të vijojnë regjistrimin.
Raundi i parë i regjistrimeve përfundon në datën 15 shtator, ndërsa një ditë më pas, maturantët do të kenë mundësi të çregjistrohen nëse kërkojnë një degë tjetër studimi.
/Ora News
