Lezha dhe Gjirokastra janë dy qarqet që sot po përballen me një situatë të jashtëzakonshme për shkak të zjarreve që kanë rënë.
Në Gjirokastër Një zjarr i madh ka rënë këtë mesditë në majën e Shën Dëllisë, në kufirin midis Bashkisë së Tepelenës dhe Bashkisë së Memaliajt. Terreni shumë i thyer dhe shkaku se zjarri ndodhet shumë larg zonës së banuar (3-4 orë) ka bërë të pamundur ndërhyrjen e forcave zjarrfikëse për shuarjen e flakëve.
Në Shëngjin të Lezhës zjarri është afruar në qytet duke rrezikuar jo vetëm banesat, por dhe jetën e banorëve.
Për situatën e krijuar ka reaguar sot dhe Presidenti i Republikës. Në një njoftim për mediat, zyra e shtypit e Presidencës njofton se “Presidenti i Republikës Ilir Meta është duke ndjekur me shumë shqetësim situatën aktuale të shkaktuar nga përhapja masive e zjarreve në disa qarqe të vendit, veçanërisht në Gjirokastër dhe Lezhë.
Presidenti Meta inkurajon personelin e Forcave të Armatosura dhe të Ministrisë së Brendshme, njësitë e Emergjencave Civile, si dhe drejtuesit e pushtetit vendor në këto qarqe, për marrjen e menjëhershme të të gjitha masave efektive të emergjencës, për të neutralizuar vatrat e zjarrit dhe për t’iu ndodhur pranë qytetarëve të cilët mund të rrezikohen nga përhapja masive e tyre”.
Kreu i shtetit u ka bërë thirrje institucioneve që të marrin masa urgjente dhe të koordinohen për normalizimin e situatës. “Presidenti Meta duke theksuar rëndësinë e ruajtjes së mjedisit dhe të natyrës, u bën thirrje dhe nxit institucionalisht autoritetet qendrore e vendore, për koordinimin në kohë, me qëllimin përballimin me efektivitet të situatës, për t’u ardhur në ndihmë zonave të prekura nga zjarret, veçanërisht për eliminimin e rrezikut për jetët e qytetarëve”,- deklaron Presidenti Meta.
