Me siguri që e keni parasysh që pjesa më e madhe e xhinseve kanë thumba metalikë te xhepat dhe jo vetëm, ndonëse nuk kanë asnjë funksion. Të paktën jo më.
Levi Strauss qe i pari që përdori thumbat metalikë në vitin 1873 si një mënyrë për të forcuar qepjen te xhepat dhe anësoret e xhinseve. Dizajni u njoh si XX, që më vonë u quajt 501. Me kalimin e kohës, qepjet përmes teknologjisë moderne u përmirësuan dukshëm ndaj sot, funksioni i thumbave metalikë është thjesht dekorativ.
Ndonëse për më shumë se një shekull e gjysmë industria e xhinseve është një ndër industritë më prodhuese në botë, në fakt kontribuon negativisht përsa i përket ndotjes së mjedisit për shkak të përdorimit të kimikateve të shumta.
Për këtë arsye, fondacioni The Ellen MacArthur, që pëpiqet të frymëzojë brezat e ardhshëm që të rimendojnë dhe të riprojektojnë një ekonomi pozitive, thekson se një mënyrë për të ulur prodhimin masiv të xhinseve është riciklimi.
Thumbat metalikë e vështirësojnë krijimin e veshjeve të tjera pasi heqja e tyre është e vështirë dhe dëmton copën.
Pra, kërkohet që të ndalohet përdorimi i thumbave nga markat e xhinsit, ndonëse nuk ka ende një përkrahje të menjëhershme pasi shumica e tyre shqetësohet për mënyrën sesi klientët mund të reagojnë nga ndryshimi.
