Kryebashkiakja e Shkodrës, Voltana Ademi ka reaguar pas deklaratës së ministrit të Brendshëm, Sandër Lleshaj, i cili i propozonte qeverisë që të shkarkonte kryetarin e bashkisë Vau i Dejës, Zef Hila.
Ademi në një deklaratë për mediat ka thënë se Shqipëria po shkon më keq se në 1997.
Jemi kthyer 30 vite mbrapa. Ushtria është duke vepruar në kundërshtim me ligjin pasi nuk ka urdhëra të shkruar. Mendoj që veprimi i Metës është i duhuri në kohën e duhur. Po shkojmë në degradim total të shtetit nga ana administrative. Jemi më keq se në vitin 1997. Atëherë të paktën funksiononin institucionet, tani nuk funksionojnë më, është shprehur Ademi.
Mbrëmjen e djeshme pati përplasje mes policisë dhe militantëve të PD-së, si dhe u dogjën materialet zgjedhore në KZAZ-në e Bushatit. Policia ka arrestuar rreth 15 persona për këtë ngjarje, mes të cilëve edhe vëllain e kryebashkiakut të Vaut të Dejës.
