Shqipëria ka vijuar që të jetë më e varfra e Europës edhe në vitin 2018, sipas të dhënave paraprake të publikuara sot nga Eurostat për vendet e BE-së dhe shtetet e Ballkanit Perëndimor e Turqinë.
Të ardhurat mesatare të shqiptarëve ishin sa 31 përqind e mesatares së Bashkimit Europian, me një përmirësim të lehtë nga viti i kaluar, kur ky tregues ishte 30 përqind. Së bashku me Bosnjën, po me 31 përqind, ky është treguesi më i ulët në Europë (të dhënat e Eurostat nuk përfshijnë Kosovën).
Të ardhurat më të larta në rajon i ka Mali i Zi, me 47 përqind të mesatares europiane, i ndjekur nga Serbia, Maqedonia e veriut. Për Turqinë, ky tregues është 65 përqind.
Konsumi më i ulëti nga të gjithë
Ndonëse shqiptarët kanë të ardhura në nivel të njëjtë me boshnjakët, në treguesin tjetër më të rëndësishëm atë të konsumit aktual individual, që mat mirëqenien e familjarëve dhe shprehet sipas barazisë së fuqisë blerëse, Shqipëria rezulton më e varfra në Europë, me 38 përqind të mesatares së Bashkimit Europian. Ky është një tregues që kosto e jetesës në Shqipëri është e lartë në raport me të ardhurat.
Për Bosnjën, konsumi individual për frymë është sa 41 përqind e mesatares së BE-së. Në të njëjtin nivel është dhe Maqedonia. Më i larti është sërish në Mal të Zi, i ndjekur nga Serbia.
Variacione të larta në Bashkimin Europian
Bazuar në vlerësimet e para paraprake për vitin 2018, konsumi individual për frymë, shprehur në Standardet e Fuqisë Blerëse ndryshonte nga 56 përqind në 132 përqind të mesatares së Bashkimit Evropian në Shtetet Anëtare.
Dhjetë shtetet anëtare regjistruan AIC për frymë mbi mesataren e BE në 2018. Niveli më i lartë në BE u regjistrua në Luksemburg, 32 përqind mbi mesataren e BE. Gjermania ishte rreth 20 përqind më lart, e ndjekur nga Austria, Danimarka, Mbretëria e Bashkuar, Holanda, Finlanda, Belgjika, Suedia dhe Franca, të cilat kishin nivele të regjistruara mes rreth 5 përqind dhe 15 përqind mbi mesataren e BE.
AIC për frymë, për trembëdhjetë shtete anëtare, qëndron mes mesatares së BE dhe 25 përqind më poshtë. Në Itali, Qipro, Irlandë, Spanjë dhe Lituani nivelet ishin 10 përqind ose më pak nën mesataren e BE, ndërsa Çekia, Portugalia dhe Malta ishin midis 10 përqind dhe 20 përqind më poshtë dhe Polonia, Sllovenia, Sllovakia dhe Greqia midis 20 përqind dhe 25 përqind më poshtë.
Gjashtë Shtetet Anëtare regjistruan AIC për frymë 25 përqind ose më shumë nën mesataren e BE. Estonia ishte 26 përqind më ulët, Letonia dhe Rumania ishin 30 përqind më ulët, ndërsa Hungaria dhe Kroacia kishin AIC për frymë nën 40 përqind më pak se mesatarja e BE-së dhe Bullgaria ishte 44 përqind.
Produkti i Brendshëm Bruto (BPV) i BE-së për frymë, një matës i aktivitetit ekonomik, gjithashtu tregon dallime thelbësore midis Shteteve Anëtare të BE-së. Në vitin 2018, PBB-ja për frymë e shprehur në PPS shkonte mes 50 përqind të mesatares së BE në Bullgari dhe 254 përqind në Luksemburg. Njëmbëdhjetë Shtetet Anëtare regjistruan në nivelin e BPV për frymë mbi mesataren e BE në 2018.
