Në kushtet kur dekreti i firmosur prej tij përplasi institucionet në Shqipëri, Presidenti Ilir Meta u bën sërish thirrje palëve për dialog. Ai thotë se u bën 10 ditë që kur anuloi zgjedhjet, por situata vijon që të jetë e njëjtë. Kreu i shtetit insiston sërish te dialogu, ndërsa shpreh gatishmërinë për të kontribuar për një zgjidhje sa më të shpejtë.
“U bënë dhjetë ditë që është në fuqi dekreti i Presidentit të Republikës për anulimin e datës së zgjedhjeve më datë 30 qershor, me qëllim qetësimin e situatës dhe krijimin e mundësive për dialog, që do të normalizonte situatën politike dhe do të krijonte mundësinë për një datë të re të zgjedhjeve vendore, gjithëpërfshirëse dhe demokratike.
Theksoj sërish se nuk është kurrsesi momenti për prova force, për retorikë përçarëse dhe provokuese, por për maturi dhe përgjegjshmëri të lartë për interesat kombëtare të vendit dhe vazhdimësinë e integrimit evropian që është objektiv kombëtar i të gjithë shqiptarëve.
Sërish insistoj me forcë rëndësinë e dialogut mes palëve e njëkohësisht gatishmërinë time për të kontribuar për një zgjidhje sa më të shpejtë” deklaron ai.
