Ish-kryenegociatorja në bisedimet Kosovë-Serbi, Edita Tahiri, ka komentuar zhvillimet e sotme në Samitin e Berlinit duke u shprehur se, ky samit i dha fund idesë së ndryshimit të kufijve mes Kosovës dhe Serbisë.
Në një intervistë për Ora News dhe në Top Channel, ish-kryenegociatorija Tahiri tha se Rama dhe Thaçi janë humbësit që kanë gabuar historikisht.
“Samiti i sotëm ka një rëndësi historike sepse merr procesin e dialogut, i cili ishte duke shkuar keq, ishte duke shkuar në drejtim të ndryshimit të kufijve.
Ky samit i cili shpreh qëndrimin gjerman kundër ndryshimit të kufijve, pra e ndal këtë proces që do të ishte i dëmshëm dhe e ve në drejtimin e duhur që dy shtetet, Kosova dhe Serbia të ndjekin modelin gjermano- francez, i cili është një shembull inspirues, sesi dy shtete që kanë qenë në luftë zgjidhin ato mosmarrëveshjet mes tyre.
Ky samit i jep fund gabimeve historike të Thaçit dhe Ramës dhe na nxjerr fitues neve që ishim kundër ndryshimit të kufijve, veçmas mua më ve në pozitat fituese.
Unë si kryenegociatore për 7 vjet e kam ndaluar çdo tendencë të Serbisë që të flitet për territore. Un kam krijuar një proces të fqinjësisë së mirë dhe integrimit të veriut në Kosovë.
Sot Thaçi dhe Rama e kuptuan që janë humbësit dhe janë liderë që kanë gabuar historikisht”, u shpreh Tahiri.
Sipas saj, për zgjidhjen e problemeve mes Kosovës dhe Serbisë duhet ndjekur shembulli franko-gjerman.
Ajo shtoi se, ideja e ndryshimit të kufijve e ka nervozuar kancelaren gjermane.
“Kancelarja Merkel është e nervozuar. Unë jam në kontakt me autoritetet gjermane. Është e nervozuar me faktin që ka liderë shkurtpamës që provojnë prekjen e kufijve, provojnë të kthejnë kohës pas, të rikthejnë armiqësitë e vjetra dhe luftërat e reja”, deklaroi Edita Tahiri.
