Qëkur shtëpia e vjetër u përmbyt në vitin 2017, një çift të moshuarish në Selenicë po jeton në kushte ekstreme në një çadër ushtrie. Mes pamundësive fizike për shkak të sëmundjeve dhe varfërisë, të ardhurat nuk u mjaftojnë për bukë, ndaj ilaçet i marrin me kokrra. Prej vitit 2017 kur shtëpia e vjetër u dëmtua nga përmbytjet, ky çift të moshuarish po jeton pa çati mbi kokë. Në shi apo diell streha e Gëzime dhe Mitat Mënajn është kjo çadër që ka qenë e vetmja ndihmë nga bashkia e Selenicës.
“Në çadër unë kam 5-6 muaj që ma ka dhënë bashkia. Më mirë nën tokë se mbi tokë sot unë, nuk kam qenë në këtë kategori”. Jeta brenda saj e rikthen këtë çift të moshuarish në mesjetë. Energjinë ua kanë prerë për shkak se nuk kanë mundësi ta paguajnë. Me 14 mijë lek të ardhura që kanë të dy, nuk u mjaftojnë për bukë, ndaj ilaçet i marrin me kokrra.
“Pardje kam vajtur dhe kam marrë ilaçet, jo të gjitha se nuk kisha lekë, kam marrë 10 kokrra ilaçe. Si kam paguar dritat se nuk kisha mese ti paguaja”. Prej 10 vitesh ata kanë ngritur muret e një shtëpie të re të cilës nuk arritën kurrë ti vënë çati, dyer e dritare. “Nga shteti nuk shpresoj por me besimin tuaj humanitar, po patët mundësi bëni një të mirë se e mira u zë”.
Drama e çiftit të vetmuar është e njohur për Bashkinë e vogël, e cila nga ana tjetër thotë se është në pamundësi për ti ndihmuar. Thonë se kanë bërë procedurat për kompensimin e çiftit Mënaj, por është Drejtoria e Emergjencave që duhet të paguajë. Në listë pritje sipas Bashkisë Selenicë janë edhe familjet që u përmbytën në vitin 2015.
