Zv.ministri Gent Cakaj u kërkoi sot konsullatave të nderit të dorëzojnë targat diplomatike CD brenda 15 prillit 2019. Në një konferencë për mediat, Cakaj foli për shkelje ligjore nga ana e konsujve dhe deklaroi se do të merreshin masa ndaj tyre.
Pas deklaratës së ministrit, Ministria për Europën dhe Punët e Jashtme u ka dërguar një kërkesë zyrtare gjithë 38 konsujve të nderit të dorëzojnë targat diplomatike të mjeteve që ata përdorin. Në mënyrë ultimative ministria thotë se do të merren masat që parashikon ligji për çdo rast.
Vendimi i Ministrisë për Europën dhe Punët e Jashtme ka sjellë reagime të konsujve të nderit.
Përparim Kalo, Konsull Nderi i Danimarkës në Shqipëri, shprehet se deklarata e zv/ministrit Cakaj ka etiketime që cenojnë integritetin e konsujve të nderit. Kalo shprehet se zv/ministri ka cilësuar shkelje ligjore një proces që e ka miratuar vet shteti dhe funksionon mbi një bazë ligjore. Gjithashtu, Kalo kërkon që zv/ministri Cakaj t’i kërkojë falje publikisht për etiketimet që ka bërë në adresë të tij.
“Kërkoj që ministri të deklaroj publikisht që Përparim Kalo nuk ka bërë shkelje të habitshme, për të kompensuar sado pak dëmin që ka shkaktuar lajmi i përcjellë me aq bujë në media. Jam i nderuar nga Mbretëresha Margreth II e Danimarkës dhe është e padrejtë të çnderohem nga një ministër i komanduar i shtetit tim”,– shkruan Kalo.
Po ashtu edhe Zenel Hoxha, Konsulli Nderi i Afrikës së Jugut në Shqipëri,shprehet në një reagim për mediat se targat diplomatike janë kërkuar nga vendet që ata përfaqësojnë. “Pritja e autoriteteve të vendeve që përfaqësojmë duhet t’i përgjigjet standardeve të përcaktuara qartë në Konventës e Vjenës. Shërbimi nga konsullatat e nderit është në dobi të Shqipërisë dhe marrëdhënieve të saj me vendet përkatëse. Targat diplomatike janë kërkuar nga vendi që përfaqësojmë. Shteti shqiptar dhe shërbimi i tij i jashtëm kanë treguar gjithmonë seriozitet në mardhëniet dy palëshe e më gjerë në 106 vitet që kur u krijua”,- tha konsulli Zenel Hoxha.
Reagimi ndaj këtij vendimi të Ministrisë së Jashtme ka pasur dhe nga politika. Ish-ministrit Tritan Shehu shprehet se Cakaj po merret me punë dhe detyra që i takojnë Policisë Rrugore.
“Dëgjova Zv.Ministrin e Jashtëm, që deklaronte në media, ai vetë, se do t’u hiqen targat diplomatike Konsujve të Nderit në Shqipëri. Sikur ky qenka problemi i madh i Diplomacisë sonë, shkaku i humbjes së rolit tonë parësor në Rajon, i ndryshimeve të linjave tona strategjike, i dobësimit të bashkëpunimit me partnerët tanë kryesorë, apo i bllokimit të procesit tonë të integrimit prej disa vitesh!? Në fakt ajo është një çështje për të cilën mund të shprehet jo më shumë se Policia Rrugore”,- shkruan Tritan Shehu në reagimin e tij.
Në vend që të falenderohen nga qeveria pasi ata po çojnë imazh pozitiv të Shqipërisë, po punojnë për të sjellë investime dhe krijuar atmosferë besimi nga ana e qeverive të shteteve që përfaqësojnë, duke punësuar qytetarë shqiptarë edhe vetë si biznesmenë; ata sulmohen dhe poshtrohen nga qeveria shqiptare.
Ata paguajnë vetë zyrat, punonjësit, etj dhe duhen mbajtur afër nga çdo qeveri shqiptare, bile duhet biseduar se si të ndikojnë te biznesmenët e shteteve që përfaqësojnë për ti sjellë në Shqipëri e jo duke u turr me një kërkesë idiote sikur të ishte policia rrugore, ministri i jashtëm.
Ata nuk kanë hall targe CD, por ndjehen të fyer nga ministria e jashtme e cila nuk ka vepruar pa lejen e kryeministrit në këtë sulm idiot.
