Kryeministri Edi Rama u ngrit në foltoren e parlamentit disa orë pas përfundimit të protestës së opozitës, të cilën e cilësoi një përpjekje për të dëmtuar imazhin e Shqipërisë në botë.
“E hodhën bojën e zezë për ta filmuar dhe eksportuar, sepse nuk mund të eksportojnë nëpër botë imazhet jo- mbresëlënëse të një tufe punonjësish të bashkive të Shkodrës, të Lezhës, të Kamzës, të Vorës, të Mallakastrës bashkë me Dashon e Lazaratit që mblidhen këtu për të kënduar himnin kombëtar, pasi kanë ardhur vërdalle rrugëve, por u duhet një produksion më tërheqës për të treguar një Shqipëri që nxin dhe nxihet.”
Rama ironizoi formën e zgjedhur për të protestuar nga Partia Demokratike.
“Të kthyer në një grup endacakësh rreth e rrotull parlamentit, kryeministrisë, Ministrisë së Brendshme që kërkon pushtetin.”
Por pavarësisht protestave, kryeministri Edi Rama deklaroi se zgjedhje të parakohshme nuk do të ketë.
“Është një ide thjesht dhe vetëm për të qëndruar tek gardhi, këtu në parlament nuk i fut më ajo ide ata, para qershorit të vitit 2021”.
Përtej replikave në distancë me opozitën, parlamenti votoi sot një çështje të rëndësishme; ndryshimin e ligjit që parashikon vetting për forcat e policisë. Këto ndryshime synojnë që vettingut ti nënshtrohen vetëm drejtuesit e lartë ndërsa të tjerët do të verifikohen nga kontrolli i brendshem. Zeri i vetem kunder ketyre ndryshimeve ishte iniciuesi i këtij ligji, ish-ministri i Brendshëm Fatmir Xhafaj.
“Ndryshimet që i bëhen ligjet nuk janë të duhura, nuk garantojne pavarësi. Nuk mund të bëhen nga SHCBA, ajo nuk kapacitetet e duhura për ta bëre. Argumenti financiar nuk eshte i justifikuar”.
Këtë të enjte në parlament janë betuar edhe dy deputetë nga lista e partisë Demokratike, Arben Elezi dhe kreu i Ballit Kombëtar Adriatik Alimadhi, i cili mori mandatin e PD-së në Vlorë. Gjithashtu këtë të enjte ka dorëzuar në KQZ, formularin e dekriminalizimit Korab Lita, ish nënkryetari i bashkisë Kamëz i cili bëhet deputeti i 100 i parlamentit.
