Partia Socialiste ka gati 6 vite në qeveri dhe logjika kokëfortë ta do që, një parti shqiptare e cila ka 6 vite në pushtet, nuk ka si të mos jetë e bërë pis dhe e lodhur, e mbushur me skandale apo probleme të larmishme. Qeveria Rama nuk i zgjidhi dot të gjitha ato që premtoi para 6 apo 2 vitesh (nuk është se e pretendonte njeri t’i zgjidhte të gjitha) dhe sot vendi ka probleme ekonomike, raste korrupsioni, mungesë reformash dhe alternativash.
Për këto arsye dhe për një motiv të dalë rishtaz nga gojët opozitare, se qeveria aktuale ka blerë zgjedhjet e viti 2017, opozita e bashkuar (PD + LSI) na ftojnë t’i bashkohemi protestës së madhe që sipas tyre priten të organizojnë dhe të rrëzojnë qeverinë Rama. Basha dhe Kryemadhi po shfaqen shumë parimorë dhe thonë se kërkojnë një sistem të ri, zgjedhje të parakohshme pa Ramën, me shumë garanci dhe do rregullojnë shumë probleme në vend.
Por kur marrim në konsideratë alternativën opozitare për të protestuar, nuk mund të mos na vijë ndërmend shprehja: “Ma hidh një herë, është faji yt, ma hidh dy herë, është faji im!”. Kur partia famkeqe për shit-blerje votash LSI, një parti e ndërtuar dhe e shumuar në atë mënyrë, flet kundër fenomenit të shit-blerjes së votave, përveçse një hipokrizi e madhe, kërkon të na bëjë edhe për budallenj, këtu egoja e një njeriu të arsyeshëm ngre krye. Unë nuk protestoj dot në krah të Monika Kryemadhit kundër blerjes së votave.
Kur kryetari i PD sot, Lulëzim Basha flet se ky vend është i vjedhur dhe fajtori i vetëm për këtë është Edi Rama, ai ka pjesërisht të drejtë. Fajtor është Edi Rama, patjetër që një pjesë të mirë të fajit e ka, por kur Basha dhe partia e tij, e cila shtrydhi 8 vjet pushtetin, “lan duart” dhe nuk bën auttokritikë, unë nuk mund ta pres zgjidhjen kundër vjedhjes dhe korrupsionit nga ai apo personazhë që janë demaskuar e rrëzuar.
Kur Fatmir Mediu, pa më të voglin e turpit, deklaron se ka burra të ndershëm që duan ta drejtojnë këtë vend, nuk më vjen të qesh, por të ‘shpërrthej” nga zemërimi se sa keq e meriton të tallet ky popull nga klasa politike që e përfaqëson.
Unë kam në fakt 1001 arsye për të protestuar, por jo në 16 Mars. Punësimi në administratë vazhdon dhe është peng i qokave partiake dhe jo sistem meritokracie. Rrogat janë ndër më të ultat në rajon. Kontrolli dhe cilësia e ushqimeve është për të vënë ulërimën. S’ka tender dhe koncesion publik ku nuk përflitet për miliona euro nën dorë dhe populli me shprehjen “Ku ka zë nuk është pa gjë” ja jep përgjigjen atyre që kërkojnë prova medoemos. Sot njerëzit nuk kanë alternativa pasi mbarrojnë universitete prestigjoze jashtë vendit, por kthehen dhe punojnë në “Call Centre”. Sot arsimimi ka probleme thelbësore, policia është e lidhur me krimin, shteti çalon, qytetarët mbijetojnë por nuk jetojnë. Jam shumë i dëshpëruar për të gjitha këto, por këto probleme nuk erdhën me ardhjen në qeveri të Edi Ramës.
A ka faje Rama? Po, sigurisht, ka fajin e madh që bëri shumë pak, ose aspak për ta përmirësuar gjendjen. U mjaftua me fasadat dhe në zgjedhjet e ardhshme një nga “kuajt më të mirë të betejës” që do përdorë PS, është vetëm kryetari i Bashkisë së Tiranës, Erjon Veliaj dhe ndryshimet që ai ka sjellë në qytet. Shumë pak për një qeveri, që t’i mburet elektoratit.
Por me gjithë këto probleme, nuk dua t’i jap ushqim luftës mes disa politikanëve të konsumuar e rikonsumuar duke shkuar në protestën e 16 Marsit që ka thirur opozita. Nëse pati një të drejtë Edi Rama në intervistën në mediat italiane javën e kaluar, ishte thënia se kjo është një luftë brenda “pallatit të politikës”. Është brenda politikës dhe për politikën! Nuk është një luftë për qytetarët. Ai që nuk e kupton këtë, është ose si “ata”, ose i është shplarë truri nga “ata”.
Unë nuk do dal në protestën e datës 16 Mars, por do protestoj nga 17 Marsi e në vijim, çdo ditë, mjafton mos e thërrasë protestën opozita. Do protestoj kundër çdo politikani që ka qënë qoftë edhe një ditë të vetme në pushtet, pasi nuk erdhi kurrë aty për popullin, por në kurriz të popullit të vet.
Sot situata imponon një zgjidhje dhe urgjente madje. A duhet përfituar nga ky kaos në politikën tonë, për të krijuar një hapësirë kur njerëz të rinj, me merita, me ndërgjegje dhe besueshmëri të hynë dhe të marrin në dorë fatet e vendit? Nëse ka, ky është momenti i artë, për tu bërë heronj!
