Blogerja Alice Taylor dhe partneri i saj Ergys Hoxha
Ditën e sotme autoritetet shqiptare kanë refuzuar rinovimin e lejes së qëndrimit për gazetares angleze, Alice Taylor. Sipas Taylor ky vendim është politik dhe ka lidhje me qëndrimet e saj të ashpra për situatën politike shqiptare në preononcimin për televizionin rus “Russia Today”.
Lajmin e bëri të ditur vetë blogerja me anë të satuseve në rrjetet sociale. “Qeveria shqiptare, pasi më ka sulmuar mua dhe partnerin tim për shkak të punës sime si gazetar dhe kritikat e mia ndaj tyre, tani kanë anuluar rinovimin e lejes sime të qëndrimit.
Kështu që tani jam këtu në mënyrë të paligjshme dhe kërkohet të largohem, pavarësisht se kam një certifikatë mjekësore duke thënë se nuk mund të udhëtoj për shkak të komplikimeve që dalin nga të qenit gati 6 muaj shtatzënë. Me një fëmijë shqiptar,”- shkruan Taylor.(Lexo këtu)
Por kush është Alice Taylor?
Alice Ophelia Taylor jeton prej vitesh në Shqipëri, ku ka njohur edhe partnerin e saj, Ergys Hoxhën, për të cilin u hodhën dyshime se ka qenë truproja i kryeopozitalit, Lulzim Basha. Por, kjo gjë është mohuar nga vetë blogerja.
Gazetarja është mjaft e njohur për publikun shqiptar si blogere. Ajo zotëron blogun “Balkanista”, një blog dedikuar shqiptarëve dhe Shqipërisë ku promovohet turizmi dhe kultura jonë. Alice nuk ka lënë pas as fenomenet tipike shqiptare dhe një prej tyre flet vetëm për reagimet e meshkujve tanë dhe fiksimin e tyre me vizat.
“Ti kupton se po del me një mashkull shqiptar kur…” kështu e titullon Alice shkrimin, ku më pas rendit të gjitha karakteristikat tipike.
“-Kur mamaja e tij të shtron ose të dërgon racione me ushqim të bërë vetë.
-Fillon të shash rrjedhshëm në gjuhën shqipe.
-E kupton se familja vjen mbi gjithkënd e mbi gjithçka.
-E gjen veten me një këndvështrim pasionant mbi politikën, pavarësisht se di shumë pak për të dhe zotohesh që nuk do të formosh një opinion.
-E kupton se ftesa për një kafe është e ngjashme me një deklaratë dashurie.
-Mbeten të zhgënjyer dhe të habitur nga fakti se ti ke një pastruese shtëpie dhe nuk i bëni punët vetë.
-Ty të lind një interes i thellë për traditën, kulturën dhe historinë e tyre.
-E gjen veten duke besuar/pranuar se pak xhelozi është diçka e mirë dhe përfaqëson drejtpërsëdrejti nivelin e dashurisë në një marrëdhënie.
-E kupton se ata nuk janë të gjithë të fiksuar pas statusit ‘cool’/pasaportave apo vizave.
-Ti e kupton se gjithçka është e mundur në Shqipëri.
-Ti ke partnerin më të mirë ndonjëherë dhe nuk do ta kesh ndryshe,”– shkruante ndër të tjera blogerja në këtë artikull.
Por në një tjetër shkrim Alice ka vënë në dukje bukurinë përrallore të Thethit dhe se sa kënaqësi ka ndjerë ajo kur e ka vizituar këtë vend, të cilin e quan ‘vend legjendash, një parajsë e veçuar nga bota plot mrekulli dhe mister’.
Pjesë nga shkrimi i blogeres për Thethin.
Në qoftë se dikush do të më kishte thënë një vit më parë, se unë sot do të isha duke udhëtuar përmes maleve të Shqipërisë veriore, majë një Harley Davidson-i, do ta quaja të çmendur. Por ia tek isha, me ajrin e nxehtë aromë manushaqe që më rreh fytyrën, diellin që godet lëkurën time të përskuqur, dhe vibrimet e motorrit që dallgëzojnë deri në thelb të qënies time.
“Kjo është ndjesia e lirisë”-mendova më vete ndërsa tërhoqa duart nga gjoksi i tij duke i hapur anash për ti shtriqur, me sytë e mbyllur e kokën e tërhequr prapa, ndërsa bota nxitimthi mbetej pas…
…. Pikëmbërritja jonë ishte Thethi, një fshat i vogël strukur në mes maleve të Shalës. Të shkosh atje është e mundur vetëm nëpërmjet një rrugë të gurtë prej 25 kilometrash që përqafon shpatet e malit, e gjarpëron lart e poshtë majash kërcënuese që paralajmërojnë vdekjen e kujtdo që nuk i përmbahet shtegut të ngushtë malor.
I kërkova shoferit tonë të më tregonte për Thethin, dhe me një anglishtë të çalë m’u pergjigj:
“Në të gjithë e kemi prejardhjen nga një njeri, Dedë Nika, dhe u vendosëm këtu rreth 350 vjet më parë. Ata donin të mbronin besimin e tyre katolik nga Otomanët, kështu që u vendosën në një nga zonat më të largëta të vendit”.
