Me datë 27 nëntor 2018, Komisioni i Pavarur i Kualifikimit, i udhëhequr nga Olsi Komiçi, me relator Lulzim Hamitaj dhe anëtare Brunilda Bekteshi, votoi unanimisht për konfirmimin në detyrë të Besnik Canit.
Ky i fundit u rikonfirmua në detyrë edhe pse hetimi administrativ dhe denoncimet e mbërritura pranë KPK –së, flisnin për një listë të gjatë shkeljesh në lidhje me profesionalizmin dhe pasurinë.
Vendimi i KPK-së, u kundërshtua ashpër nga Operacioni Ndërkombëtar i Monitorimit.
ONM, i rekomandoi Komisionerit Publik ankimimin e vendimit për konfirmimin në detyrë të subjektit në Kolegjin e Apelimit, pasi sipas tyre Cani është konfirmuar në detyrë nëpërmjet interpretimit të gabuar të ligjit të vetingut nga KPK.
“Një nga qëllimet e procesit të rivlerësimit është rikonfirmimi i besimit të publikut në institucionet e drejtësisë. Në pikëpamjen tonë është e pamundur të konfirmohet në detyrë një subjekt kur nuk janë vlerësuar në mënyrë të rregullt disa çështje që dëmtojnë besimin e publikut,” sqaronte ONM.
Pas rreth katër muajsh, Komisioneri Publik ka njoftuar se ka ankimuar vendimin e Komisionit të Pavarur të Kualifikimit për Prokurorin e Gjykatës së Shkallës së parë në Elbasan, Besnik Cani, njëherësh këshilltarin e Prokurores së Përgjithshme të përkohshme Arta Marku dhe anëtarin e KLP-së.
