Prokuroria e Përgjithshme ka reaguar ditën e djeshme pas akuzave të Partisë Demokratike se anëtari i KLP, prokurori Bujar Sheshi, ka qenë anëtar i Sigurimit të Shtetit në kohën e diktaturës, e se institucioni i akuzës duhej ta kishte verifikuar.
Përmes një deklarate të shpërndarë për mediat, institucioni i akuzës bëri me dije se nuk ka qenë në dijeni të së shkuarës së Sheshit dhe se tashmë ky fakt do të jetë pjesë e një hetimi të thelluar nga prokuroria. “Vonesa në kthimin e përgjigjes nga AISSH dhe plotësimi i deklaratës individuale të nënshkruar prej prokurorit Bujar Sheshi, përkundrejt përgjegjësisë ligjore, që nuk përputhet në përmbajtje me Vendimin e AISSH, janë objekt i një hetimi të thelluar nga prokuroria kompetente”, thuhet në njoftimin e Prokurorisë së Përgjithshme.
Po ashtu bëhet e ditur se kandidati Sheshi në deklaratat e tij individuale, shkruan se nuk ka qenë anëtar, bashkëpunëtor apo i favorizuar i ish-Sigurimit të Shtetit. “Pjesë e dokumenteve të dorëzuara prej kandidatit Bujar Sheshi, ishte deklarata e tij individuale, e nënshkruar, përkundrejt përgjegjësisë ligjore, si detyrim ligjor i nenit 108, pika 3, shkronja “d” e ligjit nr. 115/2016, sipas të cilës, nuk ka qenë anëtar, bashkëpunëtor apo i favorizuar i ish-Sigurimit të Shtetit deri më datë 02 Korrik 1991 si dhe Formulari përkatës i Autoritetit të Informimit mbi Dokumentet e ish-Sigurimit të Shtetit (AIDSSH)”, bëri të ditur prokuroria.
Institucioni i drejtuar nga Arta Marku deklaroi se për Sheshin ka kërkuar të dhëna nga institucionet, gjatë kohës që ky i fundit aplikoi për KLP. “Në rastin e kandidatit për KLP, prokurorit Bujar Sheshi, Prokurori i Përgjithshëm, i ka kërkuar Komisionit verifikimin e të gjitha kushteve ligjore parashikuar në nenin 108 të Ligjit nr. 115/2016, dhe, njëkohësisht i ka dërguar për verifikim AISSH, formularin përkatës të plotësuar dhe nënshkruar prej kandidatit në respektim të nenit 29 të Ligjit 45/ 2015. Pasi është njohur me Relacionin e Burimeve Njerëzore datë 01. 11. 2018, sipas të cilit prokurori Bujar Sheshi plotëson kushtet dhe kriteret ligjore për të qenë kandidat i KLP, në kushtet kur verifikimi në AISSH nuk ishte një prej kritereve të parashikuar në ligj, brenda afateve ligjore të detyrueshme, Prokurori i Përgjithshëm ka vijuar me procedurën për organizimin e Mbledhjes së Përgjithshme si hapi përfundimtar për ngritjen e KLP-së”, thuhet në njoftimin e Prokurorisë së Përgjithshme.
