Emri i 20-vjeçarit Edlir Reka ka “pushtuar” mediat online, pasi piktori i ri pretendoi se kishte fituar çmimin e parë të një konkursi në Moskë, por dikush me koment në Instagram zbuloi se piktura i përkiste një artisti të huaj.
Kaq mjaftoi që të zbulohej se, pothuajse të gjitha pikturat e publikuara në Instagram-in e tij ishin fotomontazh.
Ndërkohë në lidhje me këtë ka reaguar edhe avokati Altin Goxhaj, i cili në një postim në rrjetet sociale shkruan se fakti që ishin vetë 2 gazetaret e 2 kanaleve më të mëdha televizive në vend, Top Channel dhe Tv Klan, që e kërkuan dhe ftuan duke i bërë promo pa asnjë verifikim gazetaresk që tregon standardin televiziv që kanë këto TV!
Më tej, në postimin e tij, Goxhaj shigjeton kryebashkiakun e Tiranës, Erjon Veliaj për të cilin thotë se mashtron në të gjitha televizionet, dhe nuk ka asnjë reagim.
“Por turpi i vërtetë nuk ishte të ndjerit të mashtruar nga një kalama por ishte pikërisht revolta e moderatoreve dhe televizioneve ndaj “piktorit” 20 vjeçar gënjeshtar!
A nuk janë këto 2 moderatore dhe gjithë moderatorët e tjerë, ushtria e gazetarëve, Drejtorëve të Informacionit, Programacioneve të të gjithë TV të Oligarkisë që të bindur 1000% për 1000 arsye që fotot, videot, fjalimet e Veliajt & Co janë një mashtrim total dhe megjithatë promot TV të nxjerrin zorrët nga mjesi në darkë prej 16 vjetësh?”-shkruan Goxhaj.
Më tej, avokati i njohur thekson se “Të revoltohesh me një mashtrues të vogël që në fund të fundit nuk i u propozoi moderatoreve asnjë “ofertë të pakërkuar” për të dalë në emision por e thirrën vetë, dhe ndërkohë të promovosh prej 16 vjetësh (që prej 15 Marsit 2003) non stop mashtrimet e Veliajt, në Shqipëri kjo është revolta jonë kundër revoltës së mashtrueseve gazetareske që janë kthyer në agjente marketingu dhe bashkëfalsifikues të kryebaxhellës Veliaj!”.
Gjithashtu Goxhaj risjell në vëmendje edhe rastin e vdekjes së Ardit Gjoklajt, ndërsa vijon akuzat ndaj kryebashkiakut Veliaj.
“NEVERI TOTALE jo vetëm për mediat por edhe për gjithë lëpirësit e Kryebaxhellës Veliaj, që janë aq të paturp sa shajnë me libër shpije një copë kalama që kërkon famë si ky tipi 20vjeçar që në fund të fundit, nuk vodhi kërkënd dhe nuk kishte vrarë Ardit Gjoklajn, po thjesht po kërkonte famë për të rritur cilësinë e kënaqjes së vanitetit të vet dhe kaq!”-shkruan Goxhaj.
