Lorik Cana, i gjendur në Kosovë për shkak të një fondacioni, ka dhënë një intervistë për mediat në lidhje me kombëtaren shqiptare dhe përfaqësuesen e Kosovës. Për “RTV Dukagjini”, ish-kapiteni i kuqezinjve fillimisht ka folur për trajnerin Christian Panucci. Cana ka deklaruar se italianit i duhet dhënë ende kohë.
“Kur merr drejtimin e një kombëtareje, që ka arritur të luajë në Kampionatin Europian, pra ka arritur në një nivel të lartë, është shumë e vështirë ta mbash atë nivel. Panucci është trajner i ri dhe ka dëshirë të madhe për të arritur suksese. Le ta gjykojmë në fund të fazës kualifikuese të Kampionatit Europian”.
Më pas Loriku ka folur për përfaqësusen e Kosovës duke u shprehur me fjalë të mëdha për faktin që e mbyllli në vendin e parë grupin ku bënte pjesë në Ligën e Kombeve.
“Është një mundësi e artë për Kosovën, që ndoshta nuk do t’i përsëritet për pesë, dhjetë apo pesëmbëdhjetë vitet e ardhshme. Kosova në fazën kualifikuese të Kampionatit Europian, duke njohur rivalët e grupit, do ta ketë jashtëzakonisht të vështirë për t’u kualifikuar. Megjithatë, Kosova e ka një mundësi të artë që të shkojë në gjysmëfinale të një kompeticioni, aty ku kombëtarja e Shqipërisë nuk ka arritur për 80 vite”, – shtoi Loriku, duke pasur parasysh se “dardanët” do të sfidojnë Maqedoninë në gjysmëfinale të Ligës së Kombeve, në muajin Mars.
