“Shqiperia e konsideron anëtarësimin në NATO si arritjen më të madhe pas shembjes së komunizmit dhe kjo është arsyeja që ne përpiqemi të prodhojmë stabilitet në rajon dhe më gjerë”. Ky ishte mesazhi që Ministri për Evropën dhe Punët e Jashtme Ditmir Bushati theksoi në përfundim të takimit që pati mëngjesin e sotëm me Zv.Sekretaren e Përgjithshme të NATO-s Rose Gottemoeller.
“Ne e vlerësojmë këtë arritje dhe duke zbatuar angazhimet në praktikë dhe nga ana tjetër duke u përpjekur për të projektuar dhe rezonuar më shumë stabilitet demokratik në Ballkanin Perëndimor dhe në Europën Juglindore”, theksoi ai.
Nga ana tjetër, ministri Bushati theksoi projeksionin pozitiv që ka Shqipëria për shpenzimet në fushën e mbrojtjes. ”Shqipëria ka një rritje në shpenzimet për buxhetin e mbrojtjes, sikundër do të vijojë që të japë kontributin e saj nëpër misionet dhe operacionet që drejtohen nga NATO”, u shpreh Bushati.
Bushati dhe Gottemoeller shkëmbyen pikëpamje rreth situatës së sigurisë në rajon. Ministri Bushati gjithashtu vlerësoi rolin e KFOR-it në Kosovë, duke e konsideruar një spirancë stabiliteti për Kosovën dhe më gjerë. “Kemi shprehur gatishmërinë tonë për të bashkëpunuar më tej në mënyrë që rrezja e stabilitetit demokratik të NATO-s në rajonin tonë dhe më gjerë të jetë e pacenueshme”, tha ai.
Zv.Sekretarja e Përgjithshme e NATO-së Rose Gottemoeller, nga ana e saj vlerësoi kontributin e Shqipërisë në NATO, duke u shprehur se në këtë dekadë është treguar se “Shqipëria brenda NATO na bën më të sigurtë”.
Duke u ndalur në situatën në rajon, ajo tha se NATO ka përforcuar angazhimin praktik të mëtejshëm në Ballkanin Perëndimor.
“NATO mbështet dialogun e suportuar nga BE mes Prishtinës dhe Beogradit, si e vetmja mënyrë për paqe dhe stabilitet në rajon. Mbështetemi te Shqipëria që të vazhdojë të përdorë influencën e saj në këtë process dhe Beogradi dhe Prishtina të tregojnë qetësi dhe vetëpërmbajtje”, tha znj. Gottemoeller.
Vitin e ardhshëm kremtohet dhe 70-vjetori I themelitimit të NATO-s dhe zv.Sekretarja e Përgjithshme e NATO tha se mirëpret me kënaqësi Shqipërisë, pasi ky eveniment përkon dhe me 10-vjetorin e anëtarësimit të Shqipërisë në Aleancën Euroatlantike
