Ministri i Brendshëm Sandër Lleshi ka deklaruar dje se Shqipëria do të forcojë masat sa i takon luftës ndaj krimit kompjuterik. Duke folur në konferencën shkencore ndërkombëtare: “Krimi kompjuterik, kërcënimi kibernetik dhe siguria kombëtare”, ai tha se Shqipëria ka bërë një përparim shumë të madh në luftën ndaj krimit kompjuterik. Ai deklaroi se vendi ynë do të ketë një strategji për goditjen e krimit kompjuterik, ndërsa shtoi se zbulueshmëria vijon të mbetet e ulët.
“Qeveria shqiptare është në një proces ambicioz të modernizimit të shërbimeve për qytetarët, përmes ofrimit të tyre, përherë e më shumë, përmes platformave elektronike. Në vendin tonë, në vitin 2017, e krahasuar me vitin 2010, sipas të dhënave të Policisë, janë evidentuar 3.3 herë më shumë vepra penale në fushën e krimeve kompjuterike. Pra është figura e krimit e cila ka rritjen më të lartë në krahasim me të gjithë figurat e krimit me të cilat përballet Policia e Shtetit shqiptar dhe në të njëjtën kohë niveli i zbulueshmërisë së tyre është vetëm 27%. Pra, rreth 3 herë më i ulët se mesatarja e zbulueshmërisë së krimeve të tjera. Pra sot kemi, 3 herë më shumë krime dhe 3 herë më pak zbulueshmëri në këtë domen. Dhe këtu qëndron një ndër sfidat më të rëndësishme për të gjitha institucionet e sigurisë dhe në veçanti për Policinë e Shtetit shqiptar”, theksoi Lleshi.
Zv/ministri tha se hartimi i një strategjie kombëtare për sigurinë kibernetike do të jetë një ndër hapat e rëndësishëm, i cili do të përcaktojë objektivat, rrugët dhe burimet e nevojshme për të realizuar goditjen e krimit kompjuterik. “Shqipëria është një vend me risk shumë të lartë në fushën kibernetike, i cili kushtëzohet si nga shkalla shumë e lartë e penetrimit të internetit, edhe të shërbimeve online dhe të teknologjive të komunikimit. Nga ana tjetër Shqipëria po bën edhe një përparim shumë të madh në këtë fushë, pra në fushën e aplikimit të teknologjive moderne të komunikimit, të internetit”, tha ai.
