Ramadan Troci dhe Alma Liçaj janë dy emrat e radhës që iu bashkuan gjyqtarëve dhe prokurorëve të shkarkuar nga Komisioni i Pavarur i Kualifikimit. Dje komisioni i vetingut dha vendimin për prokurorin e Prokurorisë së Përgjithshme, Ramadan Troci dhe për kryetaren e Gjykatës së Apelit Vlorë, Alma Liçaj, duke vendosur për përjashtimin e të dyve për 15 vite nga sistemi i drejtësisë. Përmes këtij vendimi, KPK e çoi numrin e të shkarkuarve në 28, duke shtuar kështu goditjet në radhët e prokurorëve dhe gjyqtarëve që kapen me probleme. Si Ramadan Troci, ashtu edhe Alma Liçaj u shkarkuan për probleme me pasuritë. Troci, i cili njihet edhe si prokurori që firmosi vendimin për arrestimin e ish-Guvernatorit të Bankës së Shqipërisë, Ardian Fullani, kishte si të dyshimtë një apartament në zonën e Pazarit të Ri, ku jetonte me qira. Për këtë apartament është shpenzuar shuma 30 mijë euro për mobilim. KPK po ashtu ngriti dyshime lidhur me një objekt 32 metrash katrorë të ngritur mbi një sipërfaqe toke pranë shtëpisë së prindërve të tij në Paskuqan Gjithashtu, sipas trupës gjykuese, prokurori nuk ka deklaruar se ka përdorur mjetin e të vëllait të bashkëshortes. Mjeti është blerë në Gjermani për 13 mijë euro dhe më pas i është shitur vëllait të bashkëshortes me gjysmën e çmimit. Me probleme me pasurinë dolën edhe të afërmit e prokurorit të Prokurorisë së Përgjithshme. Pra mesa duket, këto probleme me pasurinë kanë qenë ato që e kanë penalizuar Ramadan Trocin, i cili kandidonte edhe për Këshillin e Lartë të Prokurorisë.
Problemet e Alma Liçajt
Probleme të shumta me pasurinë Komisioni i Pavarur i Kualifikimit i gjeti edhe kryetares së Gjykatës së Apelit të Vlorës, Alma Liçaj. Ajo rezultonte pronare e 8 apartamenteve në Tiranë dhe Vlorë dhe gjithashtu edhe e tetë automjeteve. Disa nga problemet e saj janë: në lidhje me një apartament në Tiranë me vlerë 97.664 euro, KPK u shpreh se ka mospërputhje mes deklaratës veting dhe asaj të dorëzuar pranë ILDKP, ndërsa po ashtu shtoi se Liçaj ka mungesë të burimeve financiare për vitin 2009. Gjithashtu ajo nuk vërteton dot se për blerjen e këtij apartamenti ka marrë një borxh prej 60 mijë eurosh, si edhe nuk ka deklaruar për 5 vite borxhin ndaj kunatit. Po ashtu, çifti Liçaj ka deklaruar se një makinë Benz të blerë për 50 mijë lekë në vitin 2003 e kanë shitur 10 vjet më vonë për 15 mijë euro, ndërsa një makinë të dytë të së njëjtës markë e kanë blerë për 600 mijë lekë dhe e kanë shitur për 20 mijë euro. Vetë gjyqtarja ishte e pranishme në seancën e KPK e shoqëruar nga mbrojtja, por nuk preferoi të flasë për mediat. Ndërkohë një ditë para seancës dëgjimore në KPK, Alma Licaj shpalli të pafajshëm ish-kryebashkiakun e Vlorës, Shpëtim Gjika, duke rrëzuar katër akuza në adresë të tij.
IKP ankimon Osmanin
Komisioneri Publik, Darjel Sina ankimoi dje vendimin e Komisionit të Pavarur të Kualifikimit për rikonfirmimin në detyrë të prokurorit të Krimeve të Rënda, Gentian Osmani. I njohur si prokurori që kërkoi arrestimin e Saimir Tahirit, Osmani u konfirmua në detyrë pak kohë më parë. Por Komisioneri Publik nuk ra dakord me këtë vendim dhe dje vendosi ta dërgojë çështjen e Gentian Osmanit tek Kolegji i Posaçëm i Apelimit duke kërkuar shkarkimin e tij. Sipas IKP, prokurori i Krimeve të Rënda nuk justifikon pasurinë e tij. “Konsiderojmë se, ndryshe nga sa ka konkluduar Komisioni i Pavarur i Kualifikimit, referuar gjendjes së fakteve dhe provave, Komisioneri Publik nuk krijon bindjen se subjekti i rivlerësimit ka arritur të shpjegojë bindshëm burimin e ligjshëm të pasurive dhe të ardhurave të tij, me qëllim arritjen nivelit të besueshëm në vlerësimin e pasurisë”, thuhet në ankimim.
Mimoza Ibra
