Ke një shtëpi, punë të mirë që të gjithë do ta ëndërronin, një partner super të kujdesshëm ndaj teje që të do dhe të vlerëson, bën pushime 2-3 herë në vit, por ndonjëherë diçka të pengon të jesh i lumtur. Është një lloj ankthi që mund të kesh për të ardhmen, për mënyrën se si do të shkojnë gjërat që nuk të lë të shijosh ato që ke. Nuk e di nëse ju ka ndodhur edhe juve, por unë kam shqetësimin e vazhdueshëm në jetë që diçka jo e mirë do të ndodhë. E di që nuk duhet të mendoj asnjëherë të keqen, por ndodh dhe nuk i largoj dot ato mendime. Gabimi im më i madh është që nuk e shijoj të tashmen, por është e pashmangshme që unë të mos mendoj për të ardhmen. Mundohem ta këshilloj veten që ta marrë më shtruar duke ia ngulitur në kokë se një jetë kemi të gjithë, mirëpo diçka ma trazon sërish mendjen. Gjithsesi, për të gjithë ju që ndodheni në të njëjtën situatë me mua, kam disa këshilla për t’ua dhënë juve dhe vetes:
Largoni njerëzit negativë nga vetja
Njërëzit negativë dhe ata që ankohen gjatë gjithë kohës ju bëjnë të ndiheni keq sepse ata dështojnë gjithmonë për t’i dhënë një zgjidhje problemit. Ata kërkojnë që edhe ju t’i bashkoheni jetës së tyre plot me ankesa në mënyrë që të ndihen më mirë. Ndonjëherë madje ndiheni në presion pasi, duhet t’i ngushëlloni dhe nuk keni asapk dëshirë për ta bërë këtë gjë. Prandaj e mira është që t’i mbani larg këta njerëz në mënyrë që të keni një jetë sa më të lumtur. Edhe unë bashkë me ju duhet ta bëj të njëjtën gjë.
Rrjetet sociale
Rrjetet sociale ndikojnë në lumturinë tonë. Jeta ime mund të më duket e plotësuar, por gjithmonë është dikush që në rrjetet sociale është më mirë se unë. Ndoshta duhet të ndalojmë së krahasuari jetën tonë më të tjerëve, pasi kjo ndikon tek lumturia jonë. Njësoj si unë dhe ti që po e lexon këtë artikull me siguri diçka nuk shkon në jetën tonë, mirëpo në rrjetet sociale të gjithë mundohemi që të tregojmë një jetë perfekte. Askush nuk e ka të tillë, për këtë gjë duhet të bindemi.
Kontrolloni çdo gjë
Unë e kam këtë problem shumë të theksuar. Mundohem të kontrolloj çdo gjë në jetën time. Nuk i dua të papriturat dhe mendoj për çdo gjë. Ndonjëherë duhet ta lësh veten të lirë për të qenë i lumtur pasi çdo gjë në jetë nuk e kontrollojmë dot edhe po të duam.
