Na është bërë zakon që sapo hapim sytë në mëngjes të hapim televizorin, megjithëse me shumë “pishmanllëk” sepse e dimë se çfarë do të shohim dhe çfarë do të dëgjojmë. Ndonjë gjumash, që hap televizorin pa i hapur sytë dhe veshët, tek dëgjon në orën 07.00 të mëngjesit, kur folësit e çfardo stacioni televiziv thonë: “Natën e mirë!” Gjumashi, kujton që është darkë dhe menjëherë e mbyll atë për të vazhduar gjumin. Edhe nëqoftëse hap sytë mbas pak, tek dëgjon të njëjtin avaz. “Mirëmbrëma, po japim lajmet” përsëri gjumashi apo ndonjë i ri, mundohet që të vazhdojë gjumin e tij të thellë. Ata më të moshuarit, tashmë e kanë mësuar këtë “spektakël” televiziv të përditshëm të orëve të mëngjesit, dhe i dëgjojnë ato veresie, sepse i kanë dëgjuar ato ndoshta me dhjetra herë katër apo pesë ditët e fundit. Janë të njëjtat “tak e tuke” që për të njëjtin lajm ndryshojnë vetëm të dhënat që i shkruajnë veresie apo sipas ngjyrimeve partiake. Lexon edhe të tilla: “Tërmet i madh në Itali, epiqendra e tij ishte 9 km thellësi”! “Kapen tre shqiptarë në kufirin shqiptaro-grek me tre çanta me 1.5 gram lëndë narkotike”! Viktimat nga armët e zjarrit apo armët e ftohta janë bërë pothuaj të përditshme dhe “fajtori” gjendet menjëherë, që është Rama! Ajo që nuk dihet, megjithëse kanë kaluar disa ditë që viktimës i është dhënë lamtumira e fundit në disa televizione vazhdon të shkruhet: “Viktima A. T., dyshohet se është vrarë me armë zjarri” dhe: “Forcat e policisë, janë nisur drejt vendit të ngjarjes”! Duket sikur forcat e policisë, i kanë hipur “breshkës” para katër apo pesë ditëve dhe akoma nuk kanë mbërritur në vendin e ngjarjes! Megjithëse të mbyturin e nxjerrin nga deti, edhe mbas katër apo pesë ditësh, shkruhet: “Dyshohet se është mbytur”! Loj lloj televizizmash! Por ka edhe më keq akoma me këto media vizive dhe të shkruara që për çdo incident me armë zjarri apo me armë të ftohta: “I lënduari është simpatizant i Partisë Demokratike” dhe autori i këtij incidenti “është anëtar i Partisë Socialiste” apo edhe e kundërta.
Ç’do të thotë kjo? As më shumë e as më pak, kjo do të thotë të nxitësh urrejtjen midis forcave politike, urrejtje që sa vjen e po thellohet, e cila e ka kaluar shumë herë edhe urrejtjen e dikurshme në sistemin e kaluar që nxiteshin nga nenet famëkeqe të agjitacionit e propagandës dhe luftës së klasave! Kjo rubrikë me këto “bëhen pa tregohen” nuk mbaron kurrë, por unë gjetkë e kam mendimin. Tek dëgjoj një kanal televiziv të huaj, më bën përshtypje që folësit të tij, i ka dalë “gjumi” herët dhe e dëgjoj me vëmendje. Ai e fillon ditën e re me almanakun e tij, se çfarë na kujton kjo ditë apo kjo datë, cila figurë historike apo politike që ka kontribuar për vendin, ka lindur apo është ndarë nga jeta, kush fjala vjen, e ka emrin këtë ditë, çfarë përvjetori të ndonjë ngjarje historike apo fetare na kujton kjo ditë etj., etj., të cilat janë të shumta. Duke i thënë këto disa herë në ditë qytetarëve, sidomos moshave të reja do t’u fiksohen dhe diçka do të mësojnë. Duket në pamje kjo si një gjë e thjeshtë, por në fakt ka rëndësi dhe rëndësia e saj qëndron në atë që qytetarëve të mos ju fshihet nga kujtesa historia, ngjarjet, datat, ndodhitë, figurat historike apo kombëtare. Nuk mund të ketë të ardhme një popull që fshin nga kujtesa e tij historinë. Në këtë drejtim, media ka një rol të rëndësishëm. Heronjtë e luftës nacional çlirimtare, apo edhe të periudhave të tjera historike të lashtësisë, të mesjetës apo të kohërave moderne të të gjitha fushave, janë krejt të harruar, sepse ata, as kujtohen dhe as vlerësohen.
“Heronjtë” e sotëm që na paraqiten ditë e natë në median e shkruar dhe atë vizive, janë Edmond Begot, Babalet, Alizotët, Xhisielat, Balilët, Bajrat, Agronët, Habilët etj., etj., që “pjell” ç’do ditë e ç’do orë ky sistem. Kjo krahas të këqijave të tjera, humbet edhe interesin e qytetarëve për të dëgjuar të tilla “mufkëlla” që media na servir përditë e për orë. Ditë për ditë na servirin grupe shqiptarë trafikantë e kultivues të lëndëve narkotike nëpër botë sikur shqiptarët të jenë disa milionë etj., etj. Nuk e shqetësojnë këtë media problemet e rënda sociale në këtë vend, por merren dhe na servirin të tilla “zhgarravina” si “Melani Trumpit i ngriti era fustanin”, “Kim Kardashiani, top less, më e nxehtë se kurrë”, “X prostitutë, çmend rrjetin me të pasmet apo me format e saj bombastike”! Nuk lënë prostitutë në botë pa na i servirur se cila prej tyre heq bikinit, e cila demonstron të përparmet e të pasmet, e kush prej tyre nxjerr “asetet” në shesh! Merren me të gjitha “asetet” e prostitutave dhe mirë bëjnë sepse ndonjë nostalgjik i tyre i kërkon edhe këto, por më parë të merren me problemet e shumta që shqetësojnë këtë vend e këta qytetarë. Na dalin nëpër ekrane lloj-lloj “mysybetesh” të tipave “sherifë” biznesmenë apo këngëtarë, rreperë apo menaxherë që shfaqen me automatikë e kobure në duar që nuk e merr vesh nëse janë artistë apo terroristë, janë “të fortë” që duan të dalin mbi shtetin apo janë në shërbim të një arti të vërtetë që i vlen shoqërisë e brezave të ardhshëm dhe në fund të fundit, nëse janë vlera apo janë antivlera që nxisin të keqen. E keqja nuk është personi, por është problemi që antivlerat po fitojnë të drejtën e qytetarisë. Jetojmë në kohën e krizës kur antivlerat i propagandojmë si vlera. Ku është e keqja? Për cilindo që është kapur sot në shkelje të ligjit, askush nga opozitarët, nuk është prononcuar në zbatim të ligjit pavarësisht se kush është ky, është i majtë apo i djathtë, është ministër apo është këngëtar që këndon me kobure e automatik në dorë, që i këndon kriminelit apo trafikantit! Disa prej këtyre “heronjve” siç thonë, i kanë futur edhe në tekstet shkollore që brezi i ardhshëm të mësojë prej tyre dhe t’u ngjajnë atyre në mendime e në veprime, të bëhen “heronj” si ata!. “Trim” dhe “Atdhetar” sot, nuk është ai që punon për veten e familjen e tij dhe në të njëjtën kohë ka punuar edhe për vendin, por është ai tip “sherifi” që bën “të fortin” që me xhipin e tij luksoz “ka të drejtë” edhe të të verë nën rrotat e tij, që mban kobure e automatik. Po pse ndodh kjo? Kjo ndodh sepse shteti nuk e kryen funksionin e tij e më keq akoma, në disa raste, me dëshirën e disa drejtuesve në organet e shtetit apo me paaftësinë e tyre nxitin në një formë apo në një tjetër krimin dhe korrupsionin, krijimin e lehtësirave për shkelësit e ligjit etj. Media dhe “zhurmuesit” e tyre të ashtuquajtur analistë, që i kemi “pilaf” në të gjitha emisionet si: Të “Paekspozuarit”, “Open”, “Opinion”, “360 gradë” etj., pa shkuar të qëndrosh “Një natë me Xhaxhiun” sepse ditën e nesërme, do të përpëlitesh gjithë natën në shtrat e nuk do të të zërë gjumi, merren vetëm me Edi Ramën, si e vetmja “e keqe” e këtij vendi. Le të flasin sa të duan e le të llomotisin sa të duan, askush nuk ka ndonjë simpati të veçantë për Edi Ramën, të jemi pak realistë. Edi Rama është i vetmi “me një sy midis qorrave” në këtë vend, i vetmi që kërkon të bëjë diçka për këtë vend, por ja që nuk ka mbetur “gavgaxhi” pa e sulmuar e pa e bërë fajtor për gjithçka. Me një fjalor rrugaçësh të politikanëve, me një militantizëm ekstrem të gazetarëve të tipit Peka, Rakipllari, Shkullaku and Co dhe drejtuesit e tyre të tipit Zheji, Rakipi apo Vasili, në një formë apo në një tjetër, shigjetat e tyre drejtohen vetëm kundër Ramës dhe deri më sot, nuk kanë thënë qoftë edhe një gjysmë llafi të mirë për punën e tij. Çfarë thuhet? Thuhet që Rama, “Ka kapur drejtësinë”, “Komandon drejtësinë, gjykatat e prokurorinë”, e ç’nuk thonë. Po rezultati i të gjitha këtyre, cili është? Rezultati është vetëm një, ai që Rama, edhe i vetëm po i bën ballë të gjithëve, sepse me aq sa ka mundësi, ai është në shërbim të ligjit e të shtetit ligjor dhe të gjithë opozitarët, të keqen e shohin vetëm tek ai. As vetë nuk e kuptojnë këta analistë në shërbim të padronëve të tyre, atë që tregohen të paaftë dhe të dobët, për të “hequr qafe” këtë “të keqe” të madhe me emrin Rama! Njëfarë Tritan Shehu ka marrë përsipër që të futi “spica” midis Shqipërisë dhe aleatit të saj strategjik SHBA-së, duke gjetur “gjilpërën në kashtë”, atë të votës kundër të Shqipërisë ndaj SHBA-së për çështjen e Egjiptit, pa e menduar se kjo “spicë” e “shpon” edhe atë, edhe Malltezët, edhe Strazimirët edhe “Lulen” e tyre. Me të drejtë, Rama si kryeministër është i barabartë midis gazetarëve dhe këta mundohen t’i imponohen atij sipas urdhrave që kanë marrë nga padronët e tyre “dashamirës” ndaj Ramës. Por, është po kaq e vërtetë sa asnjëherë dhe në asnjë rast, nga opozitarët dhe “sejmenët” e tyre nuk është thënë një fjalë e mirë për një operacion të policisë, për një sukses të saj, apo të ndëshkojnë një kriminel. Jemi i vetmi vend në botë me këta “dashamirës” që asnjëherë dhe në asnjë rast nuk luftojnë antiligjin, krimin e kriminelin, por venë në shënjestër në ç’do rast, policinë, prokurorinë, gjykatat e gjithçka tjetër, por vetëm kriminelin jo! Askush, as politika, politikanët e “sejmenët” e tyre analistë nuk ngrenë probleme shqetësuese të kohës së sotme kur sëmundjet e ndryshme nga ky ambient i ndotur po bëjnë kërdinë, kur korrupsioni vazhdon me shpejtësi në thellësi e duke përfshirë të gjitha fushat e të gjitha shtresat, kur varfëria është ulur këmbëkryq, kur Shqipëria po mplaket etj., etj., këta “vrasin” mendjen se si të largojnë Ramën. Vallë, a do të vijë një ditë që të gjithë të bëhen bashkë që mbasi të luftojnë “Të keqen” Rama, ta marrin edhe këtë me vete e të ecin përpara për të luftuar të keqen e madhe që ka hapur “themelet” dhe po “betonon” bazamentet e veta, që e keqja të mos shkulet kurrë nga ky vend? E keni thënë Konica qindra herë, por ngrihu nga varri dhe përsërite edhe njëherë: “Të mos humbasim kohë të kërkojmë bashkim me anën e atyre që përpiqen të mbushin taskën, që tallen me mjerimin e popullit, shqiptar dhe që kanë vetëm një ves, fitimin dhe një dashuri, ergjëndin (paranë). Me këta, jo vetëm bashkim nuk bëhet, por është edhe i rrezikshëm”! Mbase, kush e di, vjen një ditë the i thërrasin mendjes!
Nga Pandeli BARDHI
