Tre sekserë që bashkëpunonin me pedagogë të Universitetit të Elbasanit janë vënë në pranga si të përfshirë në një skemë për notë kaluese në provime kundrejt parave. Të dyshuar janë disa pedagogë, por emrat nuk bëhen të ditur për arsye hetimore, sikurse edhe shumat e paguara për një pesë. Sipas policisë ata ndikonin te pedagogët e Universitetit për të realizuar këtë veprimtari jo ligjore. Në prangat e uniformave blu të qytetit të Elbasanit përfunduan, Skënder Stafa, 46 vjeç, lindur dhe banues në fshatin Precë e poshtme, Njësia Administrative Funar, Bashkia Elbasan, Qamil Murataj, 49 vjeç, lindur në Shikaj Kukës dhe banues në Mëzez-Fushë, Njësia Administrative Kasash, Tiranë si dhe Medi Hana, 50 vjeç, lindur dhe banues në Skëndërbe, Njësia Administrative Rrajcë, Bashkia Prrenjas. Mësohet se një nga të arrestuarit, më konkretisht Qamil Murataj ka qenë para disa vitesh drejtor i një shkolle 9-vjeçare në Yrshek të Tiranës. Arrestimi i tyre u bë në kuadër të operacionit të koduar sezoni “Sezoni”. Ndalimi i tre shtetasve të lartpërmendur u bë për kryerjen e veprës penale “Ushtrimit të ndikimit të paligjshëm ndaj personave që ushtrojnë funksione publike. Policia njofton se për arsye hetimi nuk bëjmë me dije të tjera detaje, por pritet që të ketë arrestime të tjera. Pak muaj më parë në këtë universitet u arrestuan tre pedagogë, sekserë dhe studentë. Ata ishin pedagogë me emër, por që u akuzuan për korrupsion gjatë sezonit të provimeve. Burime thonë se 100-200 euro i merrnin studentëve personat e arrestuar për ti siguruar atyre notë kaluese. Ndërkohë të njëjtat burime saktësojnë se janë në hetim disa pedagogë të këtij universiteti. Për arsye hetimi, policia thotë se nuk mund të bëjë me dije detaje të tjera, ndërkohë që hetimet po kryhen në bashkëpunim me Prokurorinë e Elbasanit. Kujtojmë që ky nuk është rasti i abuziv në Universitetin “Aleksandër Xhuvani”. Kujtojmë se në muajin maj, Fakulteti i Shkencave Humane në Universitetin Aleksandër Xhuvani pësoi një tërmet ku u arrestuan 7 persona, mes të cilëve dekani i Fakultetit të Shkencave Humane, Albert Rrisaka, shefja e departamentit të gazetarisë, Elvira Lumi, si Erjola Çalja, pedagoge e ekonomikut. Në këtë operacion u arrestuan nga policia dhe tre sekserët si dhe një student. Personat e arrestuar në majë të këtij viti në bashkëpunim me njeri-tjetrin në kohë të ndryshme duke shpërdoruar funksionin publik kanë kërkuar dhe ushtruar ndikim të paligjshëm në rolin e sekserit dhe pedagogut në Universitetin “Aleksandër Xhuvani” Elbasan për marrjen e notave kaluese nga studentet gjatë sezoneve të provimeve.
Hetimet
Policia në bashkëpunim me Prokurorinë e Elbasanit, prej dy muajsh kanë nisur hetimet për tre sekserët e arrestuar ditën e djeshëm, të akuzuar se ndikonin tek pedagogët për dhënien e notës e kaluese ndaj studentëve që jepnin vlera monetare. Prokuroria ka mbajtur në vëzhgim të arrestuarit, ku kanë dalë në përfundimin se këta shtetas në të paktën katër raste kanë ndikuar tek pedagogët për ti dhënë notë kaluese studentëve që i kishin marrë para. Burime thonë se gjatë kësaj kohe është dokumentuar e plotë e gjithë veprimtaria kriminale, që sipas kohës së hetimit, përkon me provimet e vjeshtës në Universitet. Të njëjtat burime bëjnë me dije se janë identifikuar dhe pedagogët të cilët kanë bashkëpunuar me tre sekserët por emrat e tyre nuk jepen pasi ata janë vënë nën hetim nga organi i akuzës. Dyshohet se ata kanë bashkëpunuar dhe me persona të tjerë gjatë sezonit për të dhënë nota kaluese kundrejt vlerave monetare që shkonin 100-200 euro. Sipas organit të akuzës dyshohet se sekserët, paratë e përfituara nga studentët i ndanin me pedagogët. Për këtë skemë abuzive nuk janë dhënë shumë detaje pasi hetimit janë në vijim. Burime policore bëjnë me dije se në sajë të këtij operacioni priten arrestime të tjera. Fenomeni i pagesave të studentëve për një notë kaluese në Universitetet e vendit tonë mbetet një nga problematikat më madhore në arsim. Pothuajse në të gjithë Universitet e vendit ky fenomen është i pranishëm. Kujtojmë që tre ditë më parë, një infermier më qytetin e Korçës u arrestua pasi ndërhynte tek pedagogët e Fakultetin e Infermierisë për dhënien e notave kaluese, kundrejt pagesës.
Elvis Myrta
